Mahuyang, drayber pulos naghikog

CEBU, Philippines - Duha ka mga tawo ang giingong naghikog sa managlahing dapit gumikan sa ilang mga personal nga problema.

Usa ka Giovanni Español nga giingong mahuyang ang nakit-ang nagbitay sulod sa iyang lawak sa sitio San Roque barangay Sambag Uno pasado alas dos sa miaging adlaw sa lawak sa iyang apohang si Flabaiana Villafranca.

Matud pa sa amahan sa naghikog nga si Enerito nga ang iyang anak namatikdan nila sa nanglabay’ng mga adlaw nga daw dunay problema apan wala mosugilon kanila kabahin niini, giangkon hinuon niyang naggamitan og gidiling drugas ang anak.

Ang mahuyang napalgang nagbitay sa iyang apohan nga may hikot nga pisi sa liog hinungdan nga iyang gitawag ang mga kabanay aron kini badbaran sa pisi.

Samtang laing naghikog ang nakit-an sa barangay Sabang, siyudad sa Danao niadtong Martes sa alas 6:20 sa gabii.

Ang gituohang nagpakamatay mao si Edgardo Durano Manco, 40, minyo, drayber sa traysikol nga taga Sabang.

Si SPO4 Teofilo Deguilmo sa Danao City Police Station mibutyag sa Banat News nga ang anak ni Mancao, nga si Ariel, kinsa mao pay pag-abot sa ilang balay maoy nakadiskobre sa maong hitabo dihang nakita niya nga nagbitay na sa nylon nga pisi ang iyang amahan nga nagdiwalwal ang dila ug wala nay kinabuhi .

Matud pa ni Deguilmo nga ang pikas tumoy sa maong pisi gigaid sa sagbayan sa balay samtang ang laing tumoy maoy gihikot sa liog ni Manco.

Gisuwayan pa kini og hatod ngadto sa Danao City District Hospital apan gideklarar sa mga doktor nga dead on arrival.

Nasayran usab sa kapolisan gikan sa mga kabanay ni Manco nga dugay nang nag-antos ang naulahi sa sakit nga nervous breakdown.  - Darrel Carumba ug report ni Lesley Caminade (BANAT NEWS)