CEBU, Philippines - Giawhag ni opposition leader Jonathan Guardo si Mayor Tomas Osmeña nga motutok sa mga batakang panginahanglan sa dakbayan imbes nga pagpatukod og museum alang kang People’s Champ Manny “Pacman” Pacquiao.
Ang mayor mipahibalong usa ka gatos ka milyon ka pesos ang igahin sa kagamhanan sa dakbayan alang sa katukuran sa nahisgutang museum diha sa South Road Properties (SRP).
Giklaro ni Guardo nga walay dautan sa lakang ni Osmeña tungod kay ang pound-for-pound king angayan usab nga hatagan sa tanang pasidungog tungod sa nahatag niining kadungganan sa nasud lakip na sa mga Sugbuanon tungod sa sunod-sunod usab niining kadaugan sa natad sa pamoksing.
Ang labing awahi niini mao ang pagpukan sa Puerto Rican champion nga si Miguel Cotto ug pagsakmit sa welterweight belt niini ug si Pacquiao lang ang bugtong boksidor sa tibuok kalibutan nga nakahupot og pito ka bakus sa nagkalain-laing weight divisions.
Apan matud ni Guardo nga kung masakripisyo ang mga batakang serbisyo sa siyudad, mas maayong kini maoy unang hatagan og pagtagad ni Osmeña.
Gusto sa opposition leader nga gahinan og igong gasoline allowance ang kapulisan, mopalit og dugang mga fire trucks ingon man mga garbage trucks.
Labaw sa tanan kinahanglang atimanon sa mayor ang Cebu City Medical Center (CCMC) nga nahuna-hunaan sa mayor kaniadto nga ibaligya.
“Focus your energy on efficient delivery of basic services, this is my personal request to mayor Osmeña,” sumala pa ni Guardo.
Apan matud ni Osmeña nga wala niya pasagdi ang nag-unang mga panginahanglan sa mga molupyo sa dakbayan.
Gipasabot sa mayor nga ang usa ka gatos ka milyon ka pesos naglakip na sa gahin pagbutang og tangke sa tubig ibabaw sa Manny Pacquiao museum.
Midugang si Osmeña nga ubay-ubay usab ang mga garbage trucks sa siyudad ug siya walay gibalibarang mi-request niini. Ang kagamhanan sa dakbayan bag-o lang usab nga nang-apud-apod og mga patrol cars sa kapulisan gawas sa plano usab niining pagpalit og fire trucks.
Subay niini nibali pagsaway si Osmeña ngadto sa lider sa oposisyon nga walay makitang SRP sa siyudad kung ang nagdumala sa dakbayan susama ni Guardo. (BANATNEWS)