Biktima sa Frank gitabangan

CEBU, Philippines - Mikapin sa P7 milyones ang kantidad sa hinabang nga gi-apud-apod sa Department of Social Welfare and Development (DSWD) alang sa dul-ang duha ka libo ka mga kabus nga pamilya nga nabiktima sa bagyong Frank niadtong Hunyo 19, 2008 didto sa mga lungsod sa amihanang Sugbo kagahapon.

Si DSWD-7 Regional Director Ma. Evelyn Macapobre maoy nangunay sa pagpanghatag sa maong hinabang pinansyal ngadto sa mga hingtungdang pamilya aron makatabang pagpabarug og balik sa naguba nilang mga panimalay tungod sa bagyo.

Ang mga lungsod sa Sta. Fe ug Bantayan sa isla sa Bantayan maoy nakaangkon sa daku nga pahat nga mikabat og P6,465,000.

Kini alang usab sa mokabat og 1,494 ka mga pamilya nga nawad-an og mga puloy-anan dihang gikusokuso kini sa mga higanteng bawod atol sa bagyong Frank.

Samtang laing P250 mil ang gi-apud-apod ngadto sa dili muminos 50 ka mga pamilyang apektado didto sa lungsod sa Bogo ug Daan Bantayan alang sa Self Employment Assistance Kaunlaran (SEA-K) program, ug laing P381,000 ang gihatag alang sa burial assistance sa 129 ka pamilya didto sa lungsod sa Bantayan, Sta. Fe ug Madridejos.

Gitin-aw ni public information officer Jaybee Carillo sa DSWD-7 nga ang maong gahin tugbang lang kini sa DSWD sa hinabang pinansiyal nga una nang gi-apud-apod sa mga lokal nga kagamhanan ug mga Non Government Organization (NGO) ngadto sa mga apektadong pamilya. Nanghinaut ang DSWD-7 nga pinaagi sa maong ginagmay nga ayuda matabangan ang maong mga pamilya sa pagpabangon usab og balik sa ilang panginabuhi human sila masabak sa natural nga katalagman.   (Darrel A. Carumba)   (BANATNEWS)