Mipalit og lotto gipusil patay

CEBU, Philippines - Patay nang miabot sa tambalanan ang usa ka lalaki human kini pusila diha sa barangay Pajac sa dakbayan sa Lapulapu sa milabay’ng gabii.

 Ang biktima mao si Allan Oliverio Tatoy, 37, residente sa maong dapit nga usa ka construction worker.

 Base sa pasiunang imbestigasyon ni SPO1 Frederick Eslit sa Crime Against Persons (homicide) nasayran gikan sa kapuyo sa biktima nga si Celeria Cabigas nagdali kini paggawas sa ilang panimalay aron mopusta sa lotto duol ra sa ilang gipuy-an.

 Apan pipila ka gutlo nabati nalang ni Cabigas ang duha ka masipang buto ug ang mga silingan nalang niini maoy mipahibalo kaniyang napusilan si Tatoy sa wala mailhing tawo.

 Si Tatoy nakahiagom og samad pinusilan sa tangkugo ug aping gikan sa kalibre .45 ug gidali pagdala sa tambalanan sa Lapulapu City Hospital apan gideklarar nga dead on arrival, nakuha sa kapulisan ang duha ka kabhang sa kalibre .45.

 Hangtod ning pagsuwat sa balita wala pa mailhi ug masayri ang motibo sa maong pagpamusil.    (BANATNEWS)