Giluba tiyan sa pintor nabuslot

CEBU, Philippines -  Nabuslot ang tiyan sa usa ka pintor dihang giunay kini og dunggab sa iyang uyoan human malingaw og tan-aw sa sangka nila ni Manny Pacquiao ug Miguel Cotto didto sa Zone Imbaw, barangay Kalawisan, dakbayan sa Lapulapu niadtong Domingo.

Ang biktima mao si Benjie Amoin Tampus, 28 , ulitawo, usa ka pintor nga taga Imbaw, samtang ang suspetsado mao si Demetrio Amoin Yangco, minyo, uyoan sa biktima ug silingan sa naulahi.

Si PO1 John Ricafort sa kapolisan sa maong dakbayan nga nahinabi sa Banat News miingon nga nasuko ang suspetsado kay gipaninglan kini sa biktima sa abangan sa balay sa pagtuo nga dako kini og daug sa pinustahay sa away ni Pacquiao ug Cotto. Dugang pa ni PO1 Ricafort nga ang suspetsado kinsa wala moangkon nga nakadaog sa pinustahay, gibati og kalagot ug dihang naupsan kini sa pailob migamit og kutsilyo ug gidunggab ang tiyan sa biktima.

Dihang nakita niya nga mibuhagay ang dugo sa tiyan sa biktima mura’g gigripohan, dali kaayo siyang nakasibat samtang gihatod usab dayon ang biktima ngadto sa Vicente Sotto Memorial Medical Center sa dakbayan sa Sugbo.

Sa pagkakaron gipangita pa sa kapolisan ang suspetsado. (Romeo T. Limpangog ug Bong Soriano)(BANATNEWS)