Taga Lagtang wa bayri sa developer

CEBU, Philippines - Napulo ka mga molupyo sa sitio Lahara, barangay Lagtang nga nabiktima sa baha niadtong Agosto niining tuiga, hangtud karon wala pa mabayari sa ilang mga danyos.

Si Kapitan Celiapo Cabuenas sa pakighinabi niini sa Banat News kagahapon nagkanayon nga usa sa mga residente diha sa nahisgutang lugar nga si Romnick Labajo nagkanayon nga moduso sila og ilang reklamo aron sila mabayran sa ilang danyos.

Gibutyag ni Cabuenas nga hatagan niya og certification ang grupo ni Labajo pagmatuod nga mga residente sila sa lugar ug kini subay usab sa mando sa abogado sa mga biktima.

Uban sa maong mga residente nangangkon og mga danyos nga sobra sa P100,000 ug gani usa kanila nga si Gil Balbuena nangangkon nga mikabat ngadto sa P500 mil ang danyos sa iyang mga musical instrument nga nangaguba diin iyaha kining gipadala nganhi gikan sa nasud sa Japan.

Kahinumdoman nga niadtong buwan sa Agosto ang ubang parti sa barangay Lagtang ang nalubong sa baha ug ang ilang gipasanginlan niini mao ang pag-develop sa mga subdivision nga nahimutang sa ibabaw'ng bahin.

Matud sa kapitan nga sa milabay'ng tuig ang nahisgutang mga subdivision mihatag og hinabang ngadto sa mga nabiktima sa baha ug sila maoy mipaayo sa mga appliances nga nangaguba tungod kay nahumol sa tubig ug ang wala na madala sa pag-ayo gipang-ilisan nila kini og mga surplus.

Apan niining ulahing hitabo ang tagdumala sa nahisgutang mga gi-develop nga subdivision wala mohatag og mga hinabang ngadto sa mga biktima.

Ang kagamhanan sa siyudad ug barangay maoy mihatag og mga pinansiyal nga hinabang sa sobra 100 ka pamilyang apektado. – BANAT NEWS