Broadcaster nga taga Cebu gipasidunggan sa Florida

CEBU, Philippines - Usa ka kanhi broadcaster sa Sugbo napili nga modawat sa Good Citizen Award gikan sa tsirman ug mga sakop sa ahensya nga ubos sa ngalan sa mga mayor sa Sarasota, Bradentron, Venice ug Longboat Key, nga pulos sakop sa Florida, USA.

Ang nakadawat sa maong pasidungog nga nagtumbok sa iyang pagtabang sa Mayor’s Feed the Hungry Program mao si Mario O. Rabaya, sa Kimba, Cansojong, dakbayan sa Talisay, Cebu , Philippines.

Si Rabaya kinsa usa na karon ka molupyo sa Sarasota, Florida, nag-alagad kanhi sa Balita Patrol sa DYRC Radio, sa dakbayan sa Sugbo ug napili usab siya nga konsehal niadtong lungsod pa ang Talisay.

Milangyaw siya ngadto sa America niadtong 1977 ug aktibo siya sa mga katilingbanong kalihokan sa simbahang Katoliko didto sa Sarasota, Florida.

Isip tigpamaba sa Fil-Am_ Society sa Sarasota, si Rabaya mitabang sa pagpangita og trabaho ug kapuy-an sa mga langyaw nga sagad gikan sa Pilipinas didto sa Sarasota, Bradenton, Venice, Longboat Key ug ubang kanait nga dakbayan.

Ang pasidungog gitiman-an ni Joel C. Swallow, chairman sa Mayor’s Feed the Hungry Program Committee sa Sarasota City.

Si Rabaya mahimamat pinaagi sa iyang e-mail address: [email protected].  (Wen Celen) (BANATNEWS)