Nangomedya sa hubog giluba angol

CEBU, Philippines - Usa ka tawo kinsa nangomedya dala ang pagbugalbugal, nadunggaban angol didto sa Hernan Cortes Street, barangay Subangdaku, dakbayan sa Mandaue sa miaging gabii.

Ang biktima mao si Robert Ocba, 22 , ulitawo, drayber sa traysikol sa maong dapit, samtang ang miluba kaniya nailhan lang nga Junjun ug walay klarong adres. 

Si PO2 Reanato Berdon sa Presinto 2 sa Subangdaku Police Station miingon nga kuyog sa biktima ang mga higala nga nagdula og basketball nga naglakaw pauli sa ilang balay.

Apan samtang naglakaw naagian niini ang suspetsado kinsa gituohang nakainom og ilimnong makahubog kay nagwandog – wandog kini nga naglakaw unya kalit nga mipahipi sa daplin kay mangihi.

Matud pa ni PO2 Berdon nga ang biktima nga walay lingaw misinggit (agi og komedya) nga dili paihian ang maong lugar .

Ang suspetsado nga gibati og kaulaw mihiwasa gumikan sa kasuko nga gibugalbugalan siya ug nanghagit og away.

Si PO2 Berdon midugang nga mao kadto ang sinugdanan nga gikan sa panaglalis misangpot sa sinumbagay ug dihang gilupig ang suspetsado milanit kini sa gitangkil niyang kutsilyo ug gihansak sa kilid sa biktima.

Ang biktima nga nagripohan sa kilid dali nga gihatod sa iyang mga kauban ngadto sa Vicente Sotto Memorial Medical Center sa dakbayan sa Sugbo samtang ang suspetsado maoy gipangita karon sa kapolisan sa Mandaue.

Ang mga nakasaksi nagkanayon nga mao nay pago sa mga tawong bugalbugalon ngadto sa mga tawong dili nila sinati ang kinaiya.    (BANATNEWS)