4-anyos napisat sa delivery truck

CEBU, Philippines - Napisat ang ulo sa usa ka 4-anyos nga batang lalaki human maligsi sa delivery van dihang milabang kini sa National Highway sa Don Andres Soriano (DAS) Lutupan dakbayan sa Toledo niadtong Biyernes sa buntag.

Namatay ang biktima diha-diha nga si Brylle Salado nagpuyo sa nahisgutang lugar human maligsi sa luyong bahin sa ligid sa delivery van sa Dranix Distributor Inc.WFZ-692 nga gimaneho ni Harvie Oral.

Si PO3 Joy Sanchez, desk officer sa Toledo City Police nagkanayon nga wala mabantayi sa mga ginikanan ang biktima nga mitabok sa karsada nga atol usab pag-agi sa delivery van paingon sa Toledo City.

Human madasmagi ang bata naguroy pa kini ug naligsan sa luyong ligid ang ulo niini.

Ang driver gitanggong na sa karsel sa Toledo samtang gikatakdang pasakaan og kasong reckless imprudence resulting to homicide human ang mga ginikanan mipahibalong desididong mosang-at og kaso karong Lunes. (Guam Logrono)   (BANATNEWS)