Pusher nga tomboy tiklo

CEBU, Philippines - Usa ka tomboy nga suspetsadong pusher og shabu nasikop sa kapolisan didto sa sitio Galaxy, barangay Tanke, dakbayan sa Talisay kagahapon sa buntag.

Si Liberty Baguio, 30, nga taga Galaxy wala makaipsot dihang mironda ang kapolisan sa ilang balay.

Ang grupo sa mga polis nga mironda mao sila si Sr. Insp. Isagani Abalo, PO3 Rey Bucao, PO3 Benedicto Lasque, PO2 Jundave David, PO2 Roy Lofranco ug PO2 Narciso Alforque kinsa armado sa search warrant nga giluwatan ni Regional Trial Court (RTC) Judge Soliver Peras sa Branch 10.

Napunit sa kapolisan gikan sa balay ni Baguio ang mga shabu nga gisulod sa tulo ka medium size nga plastik, lima ka gagmay’ng silver nga pakete nga giusa sa pagsulod sa medium size nga plastik, unom ka gagmay’ng plastik nga pakete, usa ka gamay’ng silver nga pakete ug P1,270.00 nga salapi nga gituohang halin sa ginadiling drugas.

Si Lofranco sa pakighinabi niini sa Banat News kagahapon nagkanayon nga nakadawat sila og taho kabahin sa giingong ilegal nga kalihokan ni Baguio hinungdan nga ila kining gipanid-an sulod sa tulo ka buwan hangtod nga nasuta nila ang kamatuoran.

Si Baguio mibutyag nga   nasikop na siya kaniadto ug nakombikto tungod sa paghupot og mga kasangkapan sa paghingos og shabu ug gisentensiyahan siyang mapriso sulod sa duha ka tuig apan gumikan kay gihatagan siya og probation, kadiyot ra siya sa prisohan.

Sa pagkakaron nagpahayahay pagbalik si Baguio sa prisohan sa dakbayan. (Brenda D. Batuto)   (BANATNEWS)