CEBU, Philippines - Gipagawas na sa kapolisan sa lungsod sa Carmen ang cartographic sketch sa duha sa gituhoang mipusil patay sa kanhi polis ug dumadapig ni Mayor Sonia Pua nga si Nonito Taoy.
Ang pagpagawas sa duha ka cartographic sketch gibasi usab sa pamahayag sa mga nakasaksi sa hitabo.
Samtang si Mayor Pua ug mga dumadapig niini, mihimo karon sa ilang kampanya sa pagtigom og salapi aron ikahatag nga ganti niadtong mga tawo nga makahatag og kasayoran alang sa daling pagdakop sa mga mamumuno.
Matag usang suspetsado adunay patong nga P50 mil, ug adto kini ihatag niadtong mga tawo nga makatug-an sa mga ngalan sa mga suspetsado ngadto sa kapolisan.
Malaumon si Mayor Pua nga makapadasig kini sa mga saksi sa paghatag og impormasyon aron daling madakpan ang mga kriminal.
Mahinumdoman nga si Taoy nagbarog atubangan sa ilang buhatan ang M1 Security Agency sa Barangay Cogon West sa dihang gipusil kini patay sa wala hiilhing kriminal nga nagsakay og motorsiklo niadtong miaging adlaw alas 4:00 sa kahapunon duol sa merkado publiko sa lungsod sa Carmen.
Gawas nga si Taoy supervisor ug inspector sa M1 Security Agency, aktibo usab kini nga nagpaluyo sa tinguha ni Mayor Pua nga magpapili sa piniliay sa sunod tuig.
Si Taoy usa sa mga dumadapig sa namatay nga mayor Virginio “Benyong” Villamor nga gikidnap niadtong piniliay sa tuig 2007.
Samtang adunay mga pagduda nga may bulok politika ang pagpatay ni Taoy, apan giangkon sa kapolisan nga naghipos pa sila og mga ebidensya niini.
Subay niini si Mayor Pua nanawagan sa iyang mga dumadapig nga dili magpadala sa mga pagpanghadlok gumikan kay dili magmalampuson kadtong mga tawong mipatay ni Taoy.
Midugang si Mayor Pua nga ang nahitabo ni Taoy maoy maghatag og dakong kaisog sa iyang mga dumadapig ilabi na gayud sa umaabot nga piniliay. (BANATNEWS)