Babayeng call center agent gipusil sa tulisan

CEBU, Philippines - Kritikal ang usa ka babayeng call center agent human gipusil sa mga tulisan human mosukol kanila sa miaging gabii sa dalan H. Abellana, barangay Canduman sa maong dakbayan.

Ang biktima mao si Lesley Ann Sanoria Yu, 24, nagpuyo sa maong dapit ug kawani sa call center nga Sky Asia sa Mabolo, dakbayan sa Sugbo samtang ang gitumbok nga mipusil kaniyang tulisan wala pa mailhi nga nagsul-ob og itom nga jacket, crash helmet ug shorts nga maong.

Si SPO1 Wilfredo Rodriguez, imbestigador sa Presinto 6 sa Canduman Police Station miingon nga nagpaabot og sakyanan paingon sa iyang trabahoan ang biktima dihang naagian sa mga tulisan.

Ang mga tulisan mihunong sa iyang atubangan ug gibunlot sa angkas ang shoulder bag niini apan nagdumili pagbuhi niini ang dalaga hinungdan nga sila nagdinumogay hangtud nga kini gipusil nalang sa gikatahapan sa walang dughan.

Human makuha ang bag daling misakay og balik ang tulisan sa nagpaabot nga motor sa kauban ug misutoy samtang ang biktima gitabang sa mga tawo ug gidala sa North General Hospital.

Si SPO1 Rodriguez miingon nga dili pa nila matataw ang mga butang nga nasakiyo sa mga tulisan nga namusil sanglit dili pa man makasulti ang biktima.   (Romeo Limpangog)    (BANATNEWS)