CEBU, Philippines - Si Mayor Lakambini Reluya sa lungsod sa San Fernando mibutyag kagahapon nga kompleto na ang iyang line-up alang sa umaabot nga eleksiyon sa tuig 2010.
Kahinumduman nga si Reluya ubos sa Alayon Party nga pinangulohan ni Kongresista Eduardo Gullas diin niadtong tuig 2007 nga eleksiyon nakaatbang niini si Renee Canoy ang asawa sa iyang bise mayor karon nga si Antonio “Abbie” Canoy, si Reluya midaog og 40 lang ka botos batok kang Canoy.
Gibutyag ni Reluya nga sa milabay’ng semana mipahigayon og eleksiyon ang mga lider sa iyang kampo kung kinsa ang masulod sa lineup ug ang kanhi bise mayor nga si Erico “Cocoy” Enad ang iyang mahimong bise mayor sa 2010.
Si Enad ang usa usab sa nakaatbang ni Reluya nga midagan sa pagka-mayor sa lungsod niadtong eleksiyon sa tuig 2007.
Matud ni Reluya nga ang uban nga miapil sa iyang kampo karon mga kanhi konsehal sa lungsod kinsa boluntaryong nagpasakop sa iyang lineup apan dunay mga bag-ong nasulod.
Ang mayor mipadayag nga wala siya mahulga sa pikas kampo kini bisan pa man dili niya kaalyado ang mayoriya sa Konseho apan sa hinay-hinay nga paagi napatuman niya ang iyang mga proyekto ug programa sa lungsod usa niini mao ang pag-establisar sa San Fernando National High School. (Brenda Batuto) (BANATNEWS)