Gisaka sa Balay gipusil

CEBU, Philippines - Samaran ang usa ka batan-on human kini gisaka ug gipusil sulod sa iyang panimalay sa usa ka gipasanginlang sakop sa fraternity sa milabay’ng gabii sa Purok Manga, barangay Canjulao dakbayan sa Lapulapu.

Ang biktima giilang si John Cris Abelardo, 18, residente sa maong dapit samtang ang mipusil kaniya wala pa mailhi apan gipaniguro niining sakop kini og fraternity.

Base sa pasiunang imbestigasyon ni SPO3 Rex Ybañez sa Crime Against Persons (Homicide) nga samtang nagtan-aw og television si Abelardo mga alas 7:45 sa milabay’ng gabii kalit kining gisaka sa gikatahapan ug gipusil.

Si Abelardo nahiagum og duha ka samad pinusilan sa abaga ug gidala sa Lapulapu City Hospital, ang gikatahapan dali usab nga nakaikyas. - Bong Soriano (BANAT NEWS)