Magtiayon napiit sa multicab nabangga sa taxi

CEBU, Philippines - Napiit ang magtiayon sa gisakyan nilang multicab nga mibangga sa usa ka taxi sa eskina Ouano Avenue ug E.O Perez, Mandaue Reclamation Area kagahapon sa kaadlawon.

Naangol sa maong disgrasya si Catalino Pescadero nga nagmaneho sa asul nga multicab (YCT 225) ug ang asawa niining si Langging, mga residente sa barangay Gun-ob, dakbayan sa Lapulapu.

Samtang ang taxi nga gikabangga mao ang Millomeda taxi nga gimaneho ni Rolito Toregosa, 48, residente sa barangay Tisa, dakbayan sa Sugbo.

Sa pasiunang report sa Mandaue City Traffic Division, nasuta nga gikan sa dakbayan sa Lapulapu ang magtiayong Pescadero padulong sa barangay Pasil aron sa pagpaningil tungod sa negosyo nila nga isda.

Pag-abot sa crossing sa Ouano Avenue ug E.O Perez, kalit lang mitabok ang taxi nga gimaneho ni Toregosa hinungdan nga nagkadasmag kini sa multicab sa magtiayon.

Gumikan sa maong aksidente, nalumping ang atubangan sa maong multicab hinungdan nga napiit ang magtiayon ug si Langging ang nagrabehan kay dugay kini nga naugkat sa mga sakop sa Emergency Rescue Unit Foundation (ERUF).

Sa dihang naugkat na si Langging, dali kining gidala sa Cebu Doctor’s Hospital.

Samtang giangkon ni Toregosa sa Banat News nga gibati siya og katulogon niadtong higayona hinungdan nga nagdalidali kini nga maka-parking sa usa ka lugar sa Mandaue Reclamation Area.

Pag-abot sa maong dapit wala siya makabantay nga sa pagtabok sa gimaneho niyang taxi, aduna ba diay sakyanan nga nagpadulong ngadto kaniya diin mao na lang iyang nabatyagan nga mipaka na ang iyang sakyanan. Nahiagom lamang siya og gamay nga samad sa iyang bukton. – BANAT NEWS