Bata gidagit sa tomboy

CEBU, Philippines - Ang publiko gipahimangnoan sa kontrobersiyal nga si Bokal Juan Bolo nga magbantay sa mga sindikato nga mangidnap og bata aron ibaligya ngadto sa mga adunahang magtiayon nga walay anak.

Gihimo kini ni Bolo pinaagi sa resolusyon human usa ka tomboy midagit og 7-anyos nga lalaki nga usa ka Grade 1 pupil sa Tuyan Central School, barangay Tuyan, lungsod sa Naga niadtong Martes sa buntag.

Ang class adviser sa Grade 1 Section Green nga si Bernadeth Generalao miingon nga ang 7-anyos nga pupil usa ka transferee gikan sa tunghaan sa siyudad sa Sugbo ug bag-ohay lang nagpuyo sa Tuyan, Naga.

Sumala pa ni Generalao sa dihang nahinabi sa DyRF nga ang bata buot unta kuhaon sa usa ka tomboy apan nagdumili ang bata sa pagkuyog hinungdan nga gipakuyog sa tomboy ang duha ka classmate nga pulos 7-anyos ug mga silingan sa biktima.

Matud pa ni Generalao nga gidala sa tomboy ang tulo ka mga bata ug gipakaon sa Jollibee sa lungsod sa Minglanilla apan gipasakay og sakyanan pabalik sa central school ug miabot ala una na sa hapon.

Ang hepe sa mga tanod sa barangay Tuyan nga si Alejandro Latayada nagkanayon nga nagpa-blotter sa ilang buhatan ang apohan sa bata nga si Amalia ug inahan nga si Cheche (mga apilyedo gipugngan samtang wala pa sila modangop sa kapolisan).

Ilang giila ang tomboy base sa gihulagway sa duha ka bata nga nakabalik sa eskuwelahan nga usa ka “Jackylou” nga giingong taga Subangdaku, dakbayan sa Mandaue ug kanhi kauban sa trabaho sa usa ka lending company sa inahan sa bata.

Matud pa sa apohan nga ang maong tomboy gika-relasyon ni Cheche kaniadto samtang ang bana niini nagtrabaho sa gawas sa nasud. Apan nagkabulag ang duha ug namalhin sila pagpuyo sa Tuyan.

Ang apohan mitug-an ngadto sa nag-imbestigar nga tanod nga ang tuyo sa tomboy pagdagit sa bata mao nga makigkita kaniya si Cheche ug makig-uli kaniya.

Sa pagsulat ning balita, ang bata wala pa mahibalik sa panimalay ug nagpabilin pa kini sa mga kamot sa tomboy.

Ang apohan ug inahan inabagan sa mga barangay tanod sa barangay Tuyan nakig-alayon sa Naga Police Station alang sa pagpangita sa bata ug pagsikop sa tomboy.

Apan sa dihang gitawagan sa Banat News, si PO2 Kenth Cabrera mitug-an nga walay na-blotter nga kasong pagpangdagit sa ilang buhatan. Apan andam silang mosusi kun modangop sa ilang buhatan ang kabanay sa gidagit nga bata.  – BANAT NEWS