CEBU, Philippines - Gikabalak-an nga mosaka ang presyo sa bakery product karong pipila ka adlaw kundili mobahar ang presyo sa asukar.
Kini maoy napanglantawan sa opisyal sa Cebu Bakery Association (CBA) nga si Mario Bordaba kinsa nagkanayon nga dako kaayo kini og epekto sa ilang mga produkto sa pan gawas lang kun may mahimo ang gobyerno sa pagpugong sa presyo sa maong palaliton.
Gipadayag ni Bordaba nga ang asukar maoy usa sa labing importante nga gamiton sa paggama og pan ug uban pang mga bakery product.
Gitumbok niya nga silang mga tag-iya sa bakery maglisod sa pagpas-an ning gipabug-atan nga presyo sa maong produkto ilabina kun mosunod usab ang pagsaka sa ubang mga ingredente sa pan.
Hinuon iyang giklaro nga sa pagka karon silang mga panadero wala pa mopataas sa presyo sa ilang mga baligya nga pan sanglit naniid pa sila sa dagan sa presyo sa asukar. - Rey B. Pasaporte (BANAT NEWS)