CEBU, Philippines - Usa ka drayber sa taxi ug usa ka bakery gipanulis sa managlahing lugar sa dakbayan sa Talisay kagahapon sa kaadlawon.
Ang drayber nga gitulis mao si Primitivo Cadingan, 54, nga taga sitio Tangkongan, barangay Basak, Pardo, dakbayan sa Sugbo ug drayber sa Van System taxi.
Samtang ang bakery nga gitulis mao ang Arbees 2 Bakeshop nga nahimutang sa barangay Poblacion, dakbayan sa Talisay.
Si Cadingan gitulis sa duha ka wala hiilhing mga tulisan ug nasakiyo ang iyang relo de pulso nga balor og P800 ug cash P1,850 samtang didto siya sa sitio Sombrea, barangay Lawaan II sa nahisgutang siyudad sa mga alas 2:30 sa kaadlawon.
Base sa imbestigasyon sa mga polis nasayran nga ang tulisan misakay sa gimanehong taxi ni Cadingan sa dapit sa barangay Pardo, dakbayan sa Sugbo ug pag-abot didto sa sitio Sombrea, gitionan dayon siya og kutsilyo sa duha niya ka pasahero uban sa pagpahibawo nga tulis.
Sa paglikay nga madisgrasya ang iyang kinabuhi, gitunol dayon niya ang iyang relo de pulso ug ang salapi nga iyang kinitaan sa panaksi.
Human niya ikahatag a ng iyang relo ug cash misibat dayon ang mga tulisan.
Sa laing bahin, sa samang oras ang Arbees 2 Bakery nga nahimutang diha sa barangay Poblacion gitulis usab og tulo ka wala hiilhing tawo.
Sila si Aileen Villarosa, 23, taga barangay Dumlog, tindera ug Mary Ann Prahinog, 20, nga maoy nagbanbtay sa maong panaderia nga pulos taga Dumlog gihimulbolan sa kapin P7,000 nga halin sa mga pan, beige bag ni Prahinog nga dunay sulod nga P1,500 nga kwarta ug Nokia 2300 cellphone nga nagkantidad og kapin sa P800, camouflage bag ni Villarosa nga dunay sulod nga P1,500 nga kuwarta, duha ka unit sa cellphone nga nagkantidad tanan og sobra sa P8,000, ID ug mga yawe.
Base sa imbestigasyon sa mga polis, nga usa sa mga tulisan kinsa nagtangkil og armas de fuego mipugos og sulod sa bakery ug mipahibawo nga tulis.
Unya misunod usab ang laing duha niya ka kauban nga maoy mipupho sa salapi ug mga butang sa mga biktima.
Sa kabalaka nga maangin ang ilang kinabuhi , wala na sila mopakita og pagsukol sa mga tulisan.
Ang tanang mga biktima lakip na ang drayber sa taxi igo lang nagtibi nga misumbong sa kapolisan sa Talisay human sa maong hitabo. Gipangita pa sa kapolisan ang mga tulisan. - Brenda D. Batuto (BANAT NEWS)