'Nalisoan' asawa gi-samurai

CEBU, Philippines - Naputos og samad dinunggaban ang usa ka 48-anyos nga ginang human kini giunay og tigbas ug dunggab sa iyang bana gamit ang samurai nga gituohang dunay deperensiya sa panghunahuna sa barangay Siocon lungsod sa Bogo niadtong milabay'ng alas 2:00 sa kaadlawon.

Ang biktima mao si Angelina Oliamot Intrampa, 48, nakaangkon og tinigbasan sa kalawasan gikan sa banang si Pedro Intrampa, 55.

Matud ni PO2 Jim Susvilla sa Bogo Police dihang nahinabi sa Banat News nakamatikod ang biktima sa iyang bana nga wala mahimutang ug wala na makatulog nianang pagkagabii sa Domingo.

Apan nianang pagkakaadlawon kalit misiyagit ang bana dayon mibarog ug mipunit og ‘samurai’ dayong tigbas ug duslak sa asawa sa tuong abaga ug bukobuko.

Ang biktima daling nagpatabang sa mga silingan ug gidala sa Verallo District Hospital, samtang ang suspek nadakpan usab dayun sa nirespondi nga mga polis ug gipasakaan og kaso.  - BANAT NEWS