CEBU, Philippines - Patay ang usa ka collector og life insurance plan human dunggaba sa iyang silingan duha ka higayon sa miaging gabii sa dalan Belguim sa barangay Suba.
Si Marlon Basio Ledesma, 37, nakaangkon og samad dinunggaban sa iyang dughan ug tiyan nga nakaingon sa hinanali niining kamatayon samtang ang suspetsado nailhan nga si Paul Abas molupyo usab sa nahisgutang lugar.
Nasayran nga ang biktima naghikay na sa panihapon sa gawas sa ilang panimalay diin sila mangaon sa iyang pamilya apan kalit nga mipatim-aw ang suspetsado ug midunggab kaniya duha ka higayon.
Ang biktima daling gidala sa iyang inahan nga si Virginia sa Cebu City Medical Center apan nakabsan gyud kini sa kinabuhi, ang suspek dali usab nga nakaikyas human sa hitabo. Lesley Caminade)
Minor namaligya'g MJ kilid eskuylahan
Usa ka 16-anyos nga batang lalaki ang nasikop kagahapon sa buntag sa mga tanod sa barangay Pooc, dakbayan sa Talisay tungod sa pagpamaligya og linikit nga marijuana sa kilid sa koral sa tunghaan sa maong barangay.
Si Konsehal Alfredo Lascona sa barangay Pooc nga nahinabi sa Banat News kagahapon nagkanayon nga ang maong minor wala na magtungha ug dugay nang gikaingong namaligya og mga marijuana sa mga tinun-an.
Tungod niini gipanid-an nila sulod sa upat ka buwan ang maong batan-on ug kagahapon sa buntag si Geraldine Figura, tanod sa nahisgutang barangay kinsa gidestino duol sa tunghaan misita sa maong batan-on. Dihang girekisa misuway unta kini og dagan apan napugngan ug dihang gisusi nakuha diha kaniya ang duha ka linikit nga marijuana hinungdan nga iya kining gidala sa police station.
Si Konsehal Dennis Basillote, tsirman sa komitiba sa edukasyon sa konseho sa siyudad nga nahinabi sa Banat News kagahapon nagkanayon nga mopahigayon siya og pakisusi sa maong hitabo aron mahimoan dayon kini og aksiyon tungod kay natahap siyang duna pay laing mga minor nga nagbuhat sa susamang kalapasan. - BANAT NEWS