Habeas corpus vs. Cebu Doc gibasura sa korte

CEBU, Philippines - Gibasura na sa korte ang kasong habeas corpus nga gipasaka sa usa ka inahan batok sa Cebu Doctors University Hospital aron lamang nga ma-release ang iyang bag-ong natawong anak nga gitanggong sa hospital tungod kay wala makabayad sa kapin sa tunga sa milyon nga bayranan.

 Si RTC-7 Branch 20 Judge Bienvenido Saneil nimando nga i-dismiss na ang maong petisyon nunot sa pagpahibawo sa abogado sa Cebu Doctors Hospital nga si Atty. Sonny Mercado nga ang anak ni Maria Lourdes Farro gi-release na sa hospital.

Kini bisan pa man og wala pa kabayad si Farro sa hospital bills nga nikabat sa 503 mil pesos. Matud pa sa kamanduan ni Judge Saniel nga dili na gikinahanglanon nga muisyu pa ang korte og writ of habeas corpus tungod kay nahibalik na man sa inahan ang naasoy'ng bata.

 Hinuon ang korte nimando ngadto sa kihanteng inahan nga moadto sa Cebu Doctors University Hospital inubanan sa iyang abogado nga si Atty. Ernie Bunacheta aron mopirma si Farro og promissory note paghatag og pagsalig sa management nga mubayad gyud kini sa obligasyon sa hinayhinay nga paagi. Nasayran nga si Farro na-admit sa naasoy'ng hospital tungod sa pulmonary infection ug nag-bleeding hinungdan nga naahat kini og panganak niadtong Hulyo 22 ning tuiga, ang bata gibutang kini sa Neo-Natal Intensive Care Unit.

 Ang inahan mitug-an sa korte nga na-discharged siya niadtong Hulyo 24 apan nagpabilin ang iyang anak sa CDH tungod kay gitambalan pa kini hinungdan sa pagburot sa bayranan.   - BANAT NEWS