Nagbinabaye abswelto's murder

CEBU, Philippines - Usa ka lalaking gipasanginlang mipatay sa silingan sulod sa usa ka diskohan giabswelto human wala maestablisar sa mga testigos ang hitsura niini atol sa pagkahitabo gawas lang sa pag-ingong nagtakuban kini aron maghitsurang babaye niadtong tungura.

Ang giabswelto mao si Charlie Bagang nga taga Tisa, Labangon, ning dakbayan kinsa giakusahang mipatay sa iyang silingang si Randy Billosello pinaagi sa pagdunggab niadtong ala-una sa kaadlawon sa Agusto 25, 2002 sulod sa diskohan sa sitio Tisa barangay Labangon.

Si RTC-7 Judge Branch 18 Judge Gilbert Moises sa iyang desisyon nagkanayon nga huyang ang testimonya sa testigos sa prosekusyon aron maestablisar ang dagway sa suspek.

Ang testigo sa prosekusyon nga si Micheal Beton, 25, usa ka negosyante og scrap jewelries nangangkong pipila ra siya ka tiil gikan sa nahitaboan dihang gidunggab patay ang biktima nga si Billosello.

Matud pa ni Beton nga nakaila siya suspetsado kay iya kining silingan bisan og nagsul-ob pa kini og sapot sa babaye ug nagtabon og itom nga panapton sa nawong.

Si Beton mibutyag nga giduol sa suspetsado ang biktima gikan sa luyo ug gidunggab kini makadaghang higayon hinungdan sa hinanali niining kamatayon ug daling midagan palayo.

Apan mas gihatagan og gibug-aton sa hukom ang pamahayag sa testigo sa depensa nga si Crispin Casio nga mitabang sa biktima nga miingon ngitngit ang lugar ug dili maklaro ang suspek.  - BANAT NEWS