Magsuong sikad driver gitipi

CEBU, Philippines - Patay nang naabot sa tambalanan ang duha ka managsuong drayber sa traysikad human sila gipamusil sa wala mailhing lalaki niadtong Lunes sa gabii diha sa Mansueto Village, barangay Bulacao, dakbayan sa Talisay.

Ang maguwang ra unta maoy tuyo sa killer apan giapil ang manghod kay namadlong nga dili ipapusil ang iyang maguwang.

Ang mga biktima mao sila si Danilo Mitra Jr., 37-anyos ug ang manghud niining si Ernesto, 34, parehong residente sa nahisgutang lugar nga kasamtangang nagpaabot og pasahero dihang gipamusil.

Si Danilo ang nakaangkon og mga samad pinusilan sa tuong bahin sa ulo diin ang bala milapos sa pikas bahin ug tuong siko samtang si Ernesto nakaangkon og samad pinusilan sa tuong bahin sa ulo nga milapos sa pikas bahin, tuong dughan, walang bugan, walang bahin sa lawas ug ilawom sa tuong bukton.

Si PO3 Mikie Espina, usa sa mga miresponde sa maong insidente mihulagway sa kriminal base sa pamahayag sa mga nakakita nga nagsul-ob og maong nga short pants, puti nga t-short ug nagkalo og bull cap nga gipayongyong.

Human sa pagpamusil midagan kini paingon sa buwangan ug wala na igkita.

Matud ni Espina nga gidul-it sa pagpusil ang managsuong Mitra gamit kalibre .45 base usab sa nakuhang lima ka kabhang sa bala niini.

Nasayran usab nga niadtong Nobiyembre, 2008 si Danilo napriso na sa Talisay City Jail tungod pagpanunggab nga miresulta sa kamatayon sa biktima niini apan nakagawas niadtong buwan sa Hunyo niining tuiga tungod kay wala mopadayon sa kaso ang mga paryente sa iyang nabiktima.

Mao kini karon ang usa sa mga gitan-aw'ng anggulo sa maong krimen sanglit sa nahipos nga pamahayag gikatahong ang tuyo gyud sa mamumuno mao si Danilo apan gibadlong sa manghod maong silang duha maoy gipamusil.  - BANAT NEWS