Cuenco 'Ambassador to Italy'

CEBU, Philippines - Gitudlo na ni Presidente Gloria Macapagal Arroyo si South District Antonio Cuenco nga mamahimong ambassador ngadto sa nasud sa Italya sa sunod tuig sa pagkapupos na sa termino niini sa pagka-kongresista.

Si Cuenco nagkanayon nga importante kini kaayong posisyon alang kaniya sanglit siya maoy mamahimong representante sa nasud sa nahisgutang nasyon sa Uropa.

Ang pahibalo naggikan kang Department of Foreign Affairs Secretary Romulo ug kini motagal og tulo ka terms nga dunay tagtulo ka tuig matag termino.

Giklaro hinuon niyang wala niya pangayoa ang nasud sa Italya maoy posisyong ihatag kaniya sa foreign service apan wala siya magbuot niini ug wala siya’y katungod pagsupak niini.

Gisaad ni Cuenco nga iyang unahon ang kahimtang sa mga Overseas Filipino Workers sa maong nasud ug uban pang polisiyang may kalambigitan sa nasud ug sa Italya.

Ang pagpili kaniya ni Romulo gikumpirmar kagahapon ni Presidente Gloria Macapagal Arroyo atol sa iyang pagbisita dinhi ug mipirma sa mga balaudnon.

Si Arroyo mipirma na sa pagdeklarar sa Lapulapu City nga Lone District ug ang pag-usab sa pangalan sa Cebu State College of Science and Technology ngadto na sa Cebu Technological University.  - BANAT NEWS