P800 mil ang danyos sa sunog sa Iba, Lapu'

CEBU, Philippines - Mokabat sa 800 mil ka pesos ang danyos sa sunog nga miugdaw sa 23 ka panimalay ug usa ka mosque sa sitio Iba, barangay Basak dakbayan sa Lapulapu sa milabay’ng hapon.

Base sa nakumpletong imbestigasyon ni SFO2 Jumid Alburo, imbestigador sa kabomberohan sa Lapulapu nasuta nga nagsugod ang kalayo sa panimalay ni Ibrahim Mostata ug gidudahang electrical misused ang hinungdan sa pag-ulbo sa kalayo.

Matud pa ni Juhari Mostata, anak ni Ibrahim nga sa wala pa mahitabo ang sunog daan na niyang nakita ang usa ka wire sa kuryente nga nagsige og ‘spark’ ug sa sunod niya og tan-aw midako na ang kalayo sulod sa ilang panimalay.

Gumikan sa kasikitsikit sa mga panimalay sa maong dapit ug sagad ginama sa mga light materials dali kaayong nakakatap ang kalayo sa palibot. Matud pa ni Alburo wala makadako og maayo ang kalayo gumikan kay walay kusog nga hangin niadtong tungura. Wala say nasamdan o naangol ug nakalas atol sa maong sunog.

Nadawat sa kabomberohan ang sunog alas 4:45 sa kahaponon ug gipaubos kini sa task force alpha apan nakontrolar dayon sulod lang sa tulo ka minutos. Matud pa ni Lapulapu City Fire Marshal Chief Insp. Recardo Cornelio dako usab ang kalainan sa ilang dali nga pagresponde sa mga sunog nga mahitabo sa Lapulapu gumikan kay duol ug dali nga makaagi ang mga bombero o fire truck sa ilang bag-ong fire station nga nahimutangan sa Gun-ob. - Bong Soriano (BANAT NEWS)