Bokal Daan andam magbise-gobernador

CEBU, Philippines - Gawas ni Provincial Board member Jose Maria Gastardo sa kwarto distrito, si Provincial Board member Julian Daan mipadayag usab nga bukas siya sa pagka-bise gobernador sa lalawigan sa Sugbu.

Matud pa ni Daan sa interview sa Banat News nga dili siya mobalibad kun tanyagan siya pagdagan sa pagkabise gobernador sa umaabot nga election ilabina kun magagikan kini sa administration party.

Apan sa pagkakaron prayoridad niya ang pagpapili pag-usab sa pagka provincial board member sa unang distrito lamang gihapon. Mga opisyales sa hunta probinsiyal nga mihangyong dili magpahingalan nagkanayon nga si Daan gipangulitawhang mahimong kandidato sa pagkabise gobernador sa kampo ni Vice Gov. Gregorio Sanchez kinsa gikatahong modagan sa pagkagobernador.

Sa nasayran, si 2nd district Congressman Pablo John Garcia ang secretary general sa One Cebu Party niadtong milabay’ng semana miingon nga nagsugod na sila og pagpangita og kandidato sa pagka bise gobernador human mipadayag si Sanchez nga mo-resign na siya sa One Cebu Party.

 Usa sa gikonsiderar nga mahimong running mate sa gobernadora mao si Daan kinsa nahimong kandidato sa pagkabise gobernador sa unang pagdagan ni Gov. Garcia apan naparot bisan sa kadaghan sa nakuha niining botos niadtong 2004 elections nga diriyot makapildi ni Sanchez sa pagkabise gobernador. - Chester Abadilla (BANAT NEWS)