Sanchez makig-atbang ni Garcia

CEBU, Philippines - Susama sa gihimo ni Senador Francis Chiz Escudero pagbiya sa Nationalist Peoples Coalition kon NPC, si Vice Gov. Gregorio Sanchez mipahibalong kun modagan siya sa pagka-gobernador kini isip usa ka independente.

 Hingpit nang mibiya sa One Cebu Party nga gipangulohan ni Gov. Gwendolyn Garcia si Sanchez tungod sa pipila ka gikasungiang mga politikanhong rason.

 Sumala pa ni Sanchez sa interview sa DyRF nga kun hingpit siyang makadesisyon sa pagdagan sa pagkagobernador sa lalawigan sa Sugbu sa umaabot nga election modagan siyang walay bise gobernador ug dili mosandig og partido nasyonal.

“Kun modagan man ko, ang akong daganan mao gyud ang pagkagobernador ug wala nay lain pa,” sigon pa ni Sanchez dihang gipangutana sa iyang reaksyon sa huhungihong nga magpasubli siya sa pagpapili sa pagkabise gobernador uban ni kanhi Cebu City Councilor Hilario ‘Jun’ Davide III nga giingong may puruhang makig-atbang kang Garcia ubos sa Liberal Party.

 Matud pang Sanchez, tumong niya niini kun siya makahupot sa maong posisyon mao ang katumanan sa dugay na niyang gipangandoy nga katumanan sa Transaxial Highway Project nga gibaliwala lamang sa administrasyon ni Garcia.

 Si Sanchez miangkon usab nga ang mga tawo ni Senador Manny Villar sa Nationalista Party miduol na kaniya ug mituki sa iyang pagdagan sa pagkagobernador ilawom sa partido ni Villar.

 Apan matud pa niya wala pa siya mohatag og commitment ngadto sa tawo ni Villar tungod sa kakomplikado sa kasabutan, nagdumili hinuon kini pagtug-an sa maong kasabutan.

 Matud pa sa bise gobernador nga ang lokal ug national leaders sa Liberal Party ni Senador Benigno ‘Noynoy’ Aquino miduol usab kaniya aron hangyuong makig-alayon sa LP sa pagdagan sa pagka-gobernador apan wala una siya mosanong niini.

 Giklaro hinuon ni Sanchez nga gawas sa pagdagan sa pagka-gobernador sa umaabot nga election lain niyang kapilian mao ang pagbalik pag-atiman sa iyang negosyo ug mopahulay na lamang sa politika.

 Dugang pa sa bise gobernador nga sa pagkakaron nagpadayon pa siya pagtimbangtimbang sa duha ka kapilian ug iya lamang agdon ang mga umaabot nga panghitabo sa national ug local nga dagan sa politika. – BANAT NEWS