Gipusil sa silingan naangol

CEBU, Philippines - Nalandig sa tambalanan ang usa ka 39-anyos nga lalaki human kini pusila sa iyang silingan tungod sa personal nga bangi didto sa barangay Lawaan III, dakbayan sa Talisay niadtong Sabado sa gabii.

Ang biktima giila sa mga polis nga si Danilo Aribohoc, taga Lawaan III samtang ang suspetsado mao si Edwin Mercado, hingkod, nga silingan ra usab sa biktima.

Si PO3 Edwin Alvarado, duty desk officer kagahapon mibutyag sa Banat News nga nakadawat sila og tawag gikan sa patrol 117 kabahin sa maong insidente ug ang grupo ni PO3 Mikie Espina sa homicide section daling miresponde sa maong hitabo.

Base sa imbestigasyon sa mga polis nga si Aribohoc naglakaw sa karsada diha sa ilang lugar dihang kalit lang mitungha si Mercado nga nagbitbit og pusil ug giduol niini ang biktima ug dayon gipusil.

Ang biktima nasabak sa walang bahin sa buko-buko ug tuong bahin sa iyang bat-ang ug gihatod dayon kini sa Vicente Sotto Memorial Medical Center sa dakbayan sa Sugbo.

Si Espina nga nahinabi sa Banat News nagkanayon nga dunay personal nga mga panagbangi ang pamilyang Aribohoc ug Mercado diin maoy ilang gituohan nga hinungdan sa maong pagpamusil.

Gibutyag niya nga ilang nabantayan nga ang mga paryente ni Aribohoc dili kaayo cooperative ngadto sa mga polis apan ilang gipaabot karong adlawa nga moanha sa ilang buhatan ang mga paryente ni Aribohoc aron mopasaka og kaso batok kang Mercado.

Samtang si Mercado kinsa nakasibat dayon padayong gipangita karon sa kapolisan. - BANAT NEWS