BOPK makigtigi sa OUR Cebu City

CEBU, Philippines - Aduna nay iparang ang oposisyon sa siyudad sa Sugbo batok sa iduso sa Bando Osmeña Pundok Kauswagan (BOPK) pagka-mayor ug bise mayor sa 2010 human ilusad sa miaging adlaw sa “OUR Cebu City” advocacy sa negosyanteng si Jonathan Guardo ug Kapitan Mary Ann delos Santos sa Lahug.

Ang advocacy nagpasabot nga Opportunity, Unity and Reform Cebu City.

Kini nagkahulogan nga si Guardo nga nagtutok lang kaniadto sa habagatang distrito, moapil na paglibot sa kabarangayan sa north district aron kuhaon ang pulso sa mga residente kalabot sa advocacy sa oposisyon. Sa samang higayon, si delos Santos nga nagsentro lang sa iyang mga kalihukan sa north district, motabok na usab sa south district aron ipaila ang OUR Cebu City advocacy.

Dinhi mitumaw ang pagtuo nga si Guardo magpapili pagka-mayor ug si delos Santos pagka-bise mayor sa dakbayan sa 2010 nga eleksiyon.

Misamot ang pagduda sa mga nanambong sa launching sa OUR Cebu City sa dihang gipadayag nilang Guardo ug delos Santos nga sila “bukas sa maong posibilidad.” Gitataw hinuon sa duha ka lider sa oposisyon nga sa kasamtangan, wala pay kausaban sa ilang tinguha nga magpapili pagka-kongresista.

Apan ilang gipadayag nga sila maminaw usab sa sentimento sa mga Sugbuanon pinaagi sa pagpahigayon og sunod-sunod nga konsultasyon ug pagsabwag sa ilang adbokasiya.

Ang OUR Cebu City advocacy maoy tubag nilang Guardo ug delos Santos sa MyCT program sa kagamhanan sa dakbayan. Giklaro hinuon sa duha ka lider sa oposisyon nga lahi ang ilang adbokasiya tungod kay wala magsentro sa personalidad kun dili nakatutok sa mga programa. - BANAT NEWS