Taga radio may plano sa Barili

CEBU, Philippines - Dako kaayo ang usa ka Barilinhon og matampo sa pagpalambo sa lungsod sa Barili tungod sa iyang halapad nga kasinatian sa media, sa community service, sa edukasyon, ug labi na sa pang gobiyerno, kung siya mosalmot sa piniliay sunod tuig.

 Si Rene Alquizola nga may 40 na ka tuig sa pagka mediaman, mipili sa early (optional) retirement gikan sa gobiyerno niadtong Enero, nagpadayon karon sa iyang konsultasyon aron makuha gayud niya ang tinuoray nga kahimtang sa kabarangayan sa lungsod sa Barili.

Matud niya, ang pangalagad sa lungsod, mapareho ra sa media kay pang public service ra man gihapon.

Hinoon, aduna pay pipila ka mga butang nga buot pa niya nga tukion ug sabton, “Adunay kalainan ang dagan sa politika karon kay sa kaniadto, kulang karon ang uban sa dedikasyon ug dili matinud-anon nga mosilbi”, matud ni Alquizola.

 Pipila sa mga “achievements” ni Rene Alquizola mao ang pagka station manager sa estasyon DYMR, pagkatudlo nga Performance Officer (Disciplinary Office) sa KBP-Cebu, iyang kalambigitan sa mga socio-civic projects ning siyudad ug sa Barili, ang pagkatudlo niya sa Board of Trustees sa Cebu State College of Science & Technology, isip representante sa Committee on Education sa Senado ug sa pagkapili niya nga usa sa 10 Outstanding Barilinians sa tuig 2008.

 Sa iyang pagka-station manager sa government station, nasinati niya ang pamaagi sa gobiyerno, bahin sa procurement ug bidding process, auditing procedure ug uban pang balaod sa Civil Service Commission.

Sa pagkatudlo niya sa CSCST Board of Trustees, iyang nasinati ang ubang pamaagi sa edukasyon nga makab-ot bisan sa mga kabus.

Mao kini ang alternative learnings, nga magtudlo ug magbaid sa mga batan-on nga wala makatiwas pag-eskwela, nga maka trabaho, ilabi na sa gawas sa nasud.

Ang iyang natukod kaniadto nga civic group, kauban ang uban nga mga nagpakabana nga Barilinhon, nakatabang panahon sa pag-ayo sa simbahan sa Barili, nakahatag usab og mga trisikad ug usa ka Jeep Wrangler sa police station sa maong lungsod.

 Siya dako kaayo og paglaum nga molambo pa ang lungsod sa Barili kung ang uban pang mabuot ug matarong nga mga molupyo, mogahin sa ilang panahon, sa bisan unsang paagi, aron matubag ang unang panginahanglan sa ilang lungsod sa Barili.   (Wen Celen)