City Hall officials andam mo-briefing kang Sonny O. bahin sa SRP

CEBU, Philippines - Andam na ang mga opisyal sa Cebu City Hall paghatag og briefing ngadto kang kanhi senador John Henry “Sonny” Osmeña labot sa South Road Properties (SRP).

Matud pa ni SRP Manager Nagiel Bañacia posibleng ugmang adlawa o sa adlaw’ng Martes sila makahatag og briefing ngadto sa kanhi senador kinsa mipahibalong iyang kanselahon ang tanang appointment kung sultihan na sa mga opisyal sa City Hall sa adlaw sa briefing.

Ang kanhi senador gustong sila si Bañacia ug City Administrator Francisco Fernandez maoy mopasabot kaniya kabahin sa SRP nga wala hinuon babagi ni Mayor Tomas Osmeña.

Apan nagkanayon ang SRP manager nga gawas nilang duha ni Fernandez, iya usab nga paubanon sa briefing ang city treasurer, city planning officer ug pipila ka engineer kay dunay mga pangutan-ang sila ray nasayod sa tubag.

 “Daghan kaayo ta og giandam nga mga pangutana nila, from A to Z manghinaut lang ko nga ilang mahatagan og tubag,” matud pa sa kanhi senador nga dunay di maayong relasyon sa ig-agaw’ng mayor.

Nagdumili hinoon ang kanhi senador pagbutyag sa pipila niini ka mga ipangutana apan kini nidugang nga iyang pug-an ug gisahon ang mga opisyal sa city hall.

Ang briefing anha ipahigayon sa Sugbu Building sa SRP aron makasud-ong usab ang kanhi senador sa nahisgutang proyekto. (Elly Bolonos)    (BANATNEWS)