Manny-Loren tandem wa pay klaro

CEBU, Philippines - Si Sen. Manny Villar kagahapon nagkanayon nga adunay pormal nga pag-anunsiyo kun kinsay iyang pares pagka-bise presidente sa 2010 nga eleksiyon.

Kini agi'g reaksiyon sa mga nanggawas nga balita nga plantsado na ang Manny-Loren tandem.

Atol sa iyang pakigtagbo sa mga sakop sa media kagahapon sa Level 8 sa Mandaue Reclamation Area, giangkon ni Villar nga gikonsiderar niya ang mga ngalan nga nanggawas nga maoy ika-tandem sa sunod tuig nga presidential elections.

Matud hinuon sa senador nga angay hatagan ang Nacionalista party og higayon nga makapahibalo sa kinatibuk-ang line-up sa partido, lakip na ang kandidato unya pagka-bise presidente ug pagka-senador.

Ang ngalan ni Sen. Loren Legarda migawas sa mga pamantalaan sa kauluhan nga maoy ipares ni Villar, apan wala kini konpirmasyon gikan sa partido mismo.

Si Villar miingon nga duha ka semana sukad karon mahibaw-an na sa mga Pilipino ang iyang ika-tandem ug ang kinatibuk-ang line-up pagka-senador. Sa laing bahin, si Villar nagkanayon nga padayon gihapon ang iyang pakigsabot sa mga lokal nga mga opisyal sa Sugbo alang sa posibleng panag-alayon alang sa sunod tuig nga politikanhong kalihukan.

Wala hinuon mohingalan si Villar kun kinsa sa mga lokal nga mga opisyal ang iyang gipakigtagboan sa iyang pagduaw sa Sugbo kagahapon.

Apan adunay mga tigpaniid sa politika nga nagkanayon nga si Gobernador Gwendolyn Garcia, sportsman Jonathan Guardo ug Kapitan Mary Ann delos Santos ang gipanguyaban sa kampo ni Villar nga maoy magsilbeng makinarya niini sa 2010 dinhi sa Sugbo.

Giangkon hinuon sa senador nga 'komplikado' ang dagan sa politika sa Sugbo, apan gisabot lamang niya kini.

Ang kontra sa politika ni Garcia nga si Mayor Tomas Osmeña ug ang iyang lokal nga partido Bando Osmeña Pundok Kauswagan (BOPK) desidido na nga mosuporta ni Senador Noynoy Aquino ug Senador Mar Roxas sa partido Liberal. (John Rey Saavedra)   (BANATNEWS)