Warrants vs mayor, DPWH officials

CEBU, Philippines - Gi-serve kagahapong adlawa sa mga sakop sa Cebu City Police Office (CCPO) ang warrant of arrest sa Sandiganbayan batok na sa mga kawani sa Department of Public Works and Highway (DPWH-7) gumikan sa kasong may kalambigitan sa pagpalit sa ‘overprice’ nga lampposts.

Si Chief Insp. George Ylanan, hepe sa Investigation Section sa Investigation Detection and Management Branch (IDMB) sa CCPO maoy ni-serve sa maong warrant of arrest gikan sa Sandiganbayan 4th Division nga gipirmahan sa chairman nga si Associate Justice Gregory Ong nga gipetsahan og Oktubre 21, 2009.

Ang mga sakop sa DPWH-7 nga subject sa maong warrant of arrest naglangkob nila ni kanhi regional director Robert Lala, Marlina Alviso, Pureza Fernandez, Cresencio Bagolor, Agustinito Hermoso, Luis Galang.

Lakip sa subject sa warrant mao sila si Restituto Diano, Ayaon Mangis, Marilyn Ojeda, Teresa Bernido, Thadeo Ouano, Helidesa Latonio, Gregorio Omo, Isabelo Braza.

 Apan ang grupo nilang Chief Insp. Ylanan uban sa tulo ka sakyanan sa Mobile Patrol Group (MPG) ang nibalik nga walay bisan usa nga nadalang mga opisyal sa DPWH-7.

Nasuta nga kasagaran sa mga respondents tua sa Manila samtang si Galang, Fernandez ug Bernido mao ray miatubang nila ni Ylanan ug nipakita’g resibo sa order sa korte nga sila nakabutang na og piyansa niadto pang Oktubre 26, 2009.

Lakip sa akusadong nabutang sa order of release mao sila si Marlina Alviso, Cresencio Bagolor, Agustinito Hermoso, Restituto Diano, Ayaon, Manggis ug Marilyn Ojeda.

Samtang ang abogado ni Mayor Thadeo Ouano, Atty. Gloria Lastimosa-Dalawampu nga gikahinabi sa Banat News sa telepono nagkanayon nga mga alas 4:30 kagahapon napirmahan ni Mandaue City Executive Judge Marilyn Yap, ang ilang motion to bail nga tag P30 mil ni kanhi Mayor Thadeo Ouano, Hidelisa Latonio, ug Gregorio Omo.

Gipadayag niining wala na maka-serve sa warrant of arrest ang mga polis sa Mandaue ngadto sa iyang mga kliyente ug nidiretso siya uban nila ni kanhi Mayor Ouano kang executive judge Marilyn Yap.

Sumala pa niini nga ang maong kaso walay kalainan sa unang kasong gibasura na sa Sandiganbayan ingon man sa Ombudsman karong tuiga diin wala gyud naghisgot sa mga pangalan sa iyang mga kliyente sa report sa Commission on Audit (COA).

Hinungdan nga ang iyang mga kliyente nasagmuyo niini ug nagtoong ang bag-ong kaso usa lang ka pagpang-harass ngadto kanila kini tungod kay pareho ra ang maong kaso ug ang giusab lang mao ang paragraph niini tungod kay ang unang kaso violation of section 3(e) of R.A.3019 as amended (Anti-Graft and Corrupt Practices Act) nga ‘causing undue injury to the government’ samtang ang bag-ong kaso paragraph section 3 (g) sa maong balaod nga nag-ingong ‘entering contract causing prejudicial to the government,’ matud pang Dalawampu.

Dako ang pagsalig ni Dalawampu nga maabswelto ra ang iyang mga kliyente niining maong kaso.

Ang lampposts gipalit sa gobiyerno niadtong gihimo ang 12th Association of South East Asian Nations (ASEAN) niadtong tuig 2007 nga giingong gipaburot ang presyo ug naalkanse ang gobiyerno.  –  BANAT NEWS