Hepe sa polis gipa-Ombudsman

CEBU, Philippines - Ang hepe sa Talisay City Police Station nga si Superintendent Henry Binas ug ang hepe sa traffic division gipangreklamo ngadto sa Ombudsman Visayas sa presidente sa United Camp 4-Jaclupan Multicab Operators and Drivers Association, Inc. (UCJ-MODA, Inc.).

Niadtong Oktubre 22, 2009 si Zaide Bacus, presidente sa UCJ-MODA, Inc. misang-at sa reklamong kalapasan sa Akta Republika 6713 kon “Code of Conduct and Ethical Standards of Public Official” batok kang Binas ug Obiso.

Kahinumdoman nga si Bacus mireklamo bahin sa operasyon sa mga habal-habal tungod kay ilegal kini ug anha magbiyahe sa ilang mga rota ug nakaapekto kini sa ilang kita.

Si Bacus sa iyang gipadangat nga suwat sa Banat News nagpakita kini sa iyang kasagmuyo tungod kay giingong dili matandog sa mga opisyal nga hingtungdan ang operasyon sa mga habal-habal.

Matud niini nga ilang gihangyo ang mga opisyal nga hingtungdan nga ipatuman ang balaod ug kung i-recognize ang mga habal-habal sa mga bukirang barangay ang gusto nila adto lang kini mag-terminal sa barangay Jaclupan nga usa ka bukirang barangay sa siyudad ug dili pasudlon sa sentro sa barangay Tabunok.

Kahinumdoman usab nga si Konsehal Arturo Bas ug Sabeniano Abatayo, Chairman ug Vice Chairman sa Traffic Commission gireklamo ni Bacus ngadto sa Ombudsman sa mao gihapon nga problema.

Si Binas sa iyang bahin, sa pakighinabi niini sa Banat News kagahapon nagkanayon nga wala pa siya’y nadawat nga kopya sa nahisgutang reklamo gikan sa buhatan sa Ombudsman ug kung duna nay maabot ngadto kaniya iyaha kining tun-an.

Ang hepe sa TCPS mibahad nga mopasaka og kasong kriminal ug civil batok kang Bacus kung iyang masuta nga dunay malisya ang gipasaka niining reklamo ngadto sa Ombudsman batok kaniya nga makaapekto sa iyang reputasyon.  - Brenda D. Batuto (BANAT NEWS)