PUJ di Pahunongon ilawom sa fly-over

CEBU, Philippines - Ang mga drayber sa public utility jeepney (PUJ) sa barangay Tabunok, dakbayan sa Talisay nagbagulbol tungod kay gidid-an na sila sa pagpahunong ilawom sa fly-over sa maong lugar.

Si SPO4 Henry Obiso, hepe sa Talisay City traffic division sa pakighinabi niini sa Banat News kagahapon nagkanayon nga sugod niadtong Nobiyembre 1, 2009 giimplementar nila ang pagdili sa pagpahunong ug pagpasakay og pasahero sa mga puj sa ilawom sa fly -over tungod kay nakahatag kini og kasamok sa pedestrian.

Matud ni Obiso nga ang mga puj butangan og terminal sa tagdumala sa south central market duol sa bag-ong mall nga gikatakdang mahuman sulod niining buwana.

Ang mga puj gitugotan na lang karon nga makapasakay og pasahero diha dapit sa tumoy sa fly -over paingon sa Gaisano Fiesta Mall.

Kung mahuman na ang terminal sa south central market ang mga puj nga gikan sa dakbayan sa Sugbo tugotan na nga makaagi diha ilawom sa fly over paingon ngadto sa terminal.

Ang mga pasahero gikan sa Sugbo anha na manaog sa terminal ug ang mga puj nga gikan sa terminal anha na tanan paagi-on ibabaw sa fly over.

Si Obiso midugang nga ang mga drayber nga nagbagulbol ning maong sistema maayong mutambong sa ipahigayong meeting sa traffic commission karong umaabot Martes aron ipadayag ang ilang yangongo.  - Brenda D. Batuto (BANAT NEWS)