Guerilla tactic gamiton vs. illegal drugs

CEBU, Philippines - Ang Dangerous Drugs Board (DDB) mosagop sa guerilla tactic sa pagpakiggubat batok sa ginadiling drugas sa tibuok nasud, matud pa ni Undersecretary Clarence Paul Oaminal sa DDB kagahapon.

Usa sa mga paagi, matud pa ni Oaminal nga sagupon sa maong ahensya mao ang pakigsandurot direktamente ngadto sa mga tiggamit ug tigpayuhot sa maong illegal nga butang sa matag barangay.

Miingon si Oaminal nga dinhi kinahanglang ihalad sa mga opisyal sa kabarangayan ug kalungsoran ang ilang dakong panahon sa pagkombinse sa ilang tagibarangay nga tiggamit o kaha tigbaligya sa gidiling druga sa paghunong na sa maong bisyo.

Kini pinaagi sa pagpakigtagbo kanila aron pasabton bahin sa kadautan sa ilang gihimo, dili lamang sa ilang kaugalingon kundili sa tibuok katilingban nga apiktado niini.

Alang kang Oaminal nga mao kini ang labing epektibong paagi nga gitawag nga taktikang ginirilya sanglit ang matag tiggamit sa illegal nga drugas naggikan man sa matag barangay.

Nasayod usab si Oaminal nga matag opisyal sa barangay maoy labing angayang masayod bahin sa mga tawo nga nanagbisyo sa ginadiling drugas sa ilang lugar.

Diha sa maong kasayoran anha gamita sa mga opisyal sa barangay ang ilang abilidad sa pagpatawag og miting sa mga hingtungdan ug badlungon sa ilang gibuhat uban sa pagpasabot sa dili maayong epekto niini kanila ug sa katilingban.

Pinaagi sa hustong pagsabot kanila , dili na kinahanglang mogasto pa ang gobiyerno og dakong kantidad sa pagpahigayon og komperensya sa mga mahalon kaayong lugar unya ang motambong kadto rang mga tawo nga wala mag-apil apil sa maong bisyo.

Matud pa ni Oaminal nga ang pagpahigayon og mga pulong-pulong sa barangay sa pagpanguna sa kapitan sa barangay o si kinsa mang kasaligang opisyal niini dako kaayo og mahimo sa pagtabang sa kampanya batok sa illegal nga drugas.

Unya dili usab kaayo madak-an og gasto ang gobyerno kay ang kasagarang patambungon niini mao ra man kadtong mga tawo nga apiktado sa kalihukan sa ginadiling drugas sama mismo sa tawong hingtungdan, sa iyang mga ginikanan

 Mahimong anha ra usab kini ipahigayon sa barangay hall, basketball court, sports complex ug uban pang mga lugar sa matag barangay nga sayon ra kaayong pundukan sa mga taga barangay.

Miingon si Oaminal nga kun matuman kini sa mga opisyal sa barangay sayon kaayo nila ang pagmintinar sa pagsalig sa katawhan kanila ug sa ilang abilidad.

Alang kang Oaminal nga sa mga opisyal sa barangay nga bright kaayo mao kini labing maayong hagdanan nga sa matag karon ug unya mahimamat nila ang mga katawhan sa barangay ug ikapakita nila ang ilang katakus nga angayan gyud diay’ng piyalan sa katungdanan ug wala mausik ang ilang pagpapili kanila alang sa maong katungdanan.  -  BANAT NEWS