Classrooms ugdaw sa sunog

CEBU, Philippines - Naugdaw ang duha ka lawak saringan sa sunog nga miigo sa usa ka edipisyo sa usa ka tunghaan didto sa Poblacion, lungsod sa Barili niadtong Huwebes sa alas 12:35 sa sayong kaadlawon.

Ang nasunog mao ang usa sa mga school buildings sa Bartolome and Manuela Pañares National High School nga dunay duha ka lawak saringan sa first year ug second year high school.

Matud ni SPO4 Andres Alpas, deputy chief sa Barili Police Station sa dihang nahinabi sa Banat News milanat og usa ka oras ang pagpakigkombate sa kabomberohan sa Barili una nasumpo ang sunog nga gipaubos sa second alarm.

Subay sa inisyal nga imbestigasyon sa kabomberohan, linya sa kuryente ang gigikanan sa sunog nga gibanabanang mibilin og danyos nga sobra sa P80 mil. Wala hinuon makakatap sa sikbit nga mga school buildings ang kalayo.

Apil sa nangasunog mao ang mga libro, notebooks ug mga musical instruments nga nakabutang sa edipisyo.

Hinuon, padayon pa ang imbestigasyon sa kabomberohan ug kagahapong adlawa mibalik kini sa fire scene aron sa pagpanghipos og dugang mga ebidensiya.

Hinuon, matud ni SPO4 Alpas pabiling normal ang klase sa maong tunghaan kagahapong adlawa bisan pa sa sunog. - Darrel Carumba (BANAT NEWS)