Tulis sa Barili inside job

CEBU, Philippines - Wala isalikway sa kapolisan nga posibleng ‘inside job’ ang pagpanulis nga nakaangol sa kanhi besi mayor ug mipatay sa asawa niini didto sa barangay Mantalongon, lungsod sa Barili niadtong Miyerkules sa alas 8:45 sa gabii.

Matud ni SPO4 Andres Alpas, deputy chief sa Barili Police Station sa dihang nahinabi sa Banat News sa paghimo ning balita padayon pa ang ilang imbestigasyon pagtumbok ug pagsikop sa duha ka suspek ug laing duha ka ‘look out’ niini.

Gikatahong mikabat og P400 mil ang kantidad sa gi-withdraw sa magtiayong Ponsica sa bangko dinhi sa dakbayan sa Sugbo nga nadala sa mga tulisan.

Matud ni SPO4 Alpas dili layo ang posibilidad nga inside job ang maong panghitabo ug taga lungsod ra sab sa Barili ang mga tulisan sanglit nahibalo man kini nga gikan nag-withdraw og kuwarta ang magtiayon.

Si kanhi Bise Mayor Luisito Ponsica, 50, luwas na hinuon sa peligro sulod sa pribadong tambalanan dinhi sa dakbayan human makaangkon og samad pinusilan sa tiyan, paa ug kamot. Patay nang nahidangat sa tambalanan ang asawa niining si Gina, 45, human makaangkon og samad pinusilan sa dughan ug tiyan.

Gikatahong misukol si Gina ug nagmagahi paghatag sa bag nga may kuwarta ngadto sa kapolisan.

Gituohan usab sa kapolisan nga giplano daan ang pagtulis sa magtiayon.

Nagtuo ang mga imbestigador nga nagpabilin pa sa Barili ang mga tulisan apan padayon pa’ng gawasnon.

Sa laing bahin, si Cebu Provincial Police Office director Jesus Gaquing mipahibalo nga ang Provincial Intelligence Branch (PIB) sa Cebu Provincial Police Office (CPPO) moabag sa kapolisan sa Barili pag-imbestigar sa maong kasong pagpanulis.

Matud ni Gaquing nga nahukman kini sa dihang nagka-estorya sila ni Chief Insp. Alexander Soledad, hepe sa Barili Police Station ug Supt. Rodolfo Albotra sa PIB atol sa pagduaw sa ospital diin na-admit ang bise mayor. – BANAT NEWS