Pensiyonada, maid gitipi sa tulisan

CEBU, Philippines - Patay nang nakit-an ang usa ka 84-anyos nga pensiyonada ug ang katabang niining babaye sulod sa pinuy-anan sa usa ka subdivision sa barangay Cogon, lungsod sa Bogo human gituohang gitulis ug pagkahuman gipamatay sa mga suspek niadtong Miyerkules sa alas 2 sa kaadlawon.

Ang mga biktima mao si Beatrez Aguinsanda Ocaba, 84, biyuda ug ang katabang niini nga si Marlinda Gallardo Olinares, 49, ug molupyo sa sitio Tipolo, barangay Cogon, Bogo.

Matud ni PO3 Allan Dosdos, imbestigador sa Bogo Police Station sa dihang nahinabi sa Banat News ang mga biktima pulos nakaangkon og daghang samad dinunggaban sa ilang tiyan, dughan ug ubang bahin sa lawas nga maoy hinungdan sa ilang hinanaling kamatayon. Nahanaw na usab ang mga alahas sa pensiyonada sa iyang kalawasan ingon man ang kuwarta niini.

Subay sa inisyal nga imbestigasiyon sa kapolisan nga giguba sa mga suspek ang screen ug jalosy blade sa kasilyas ug didto moagi. Human gitulis, gipanunggab hangtod namatay ang mga biktima.

Ang paryente sa biktima nga pensiyonada nakadiskubre sa mga patay’ng lawas pagka-gabii na human ang anak sa biktima nga atua sa gawas gibati na og kabalaka tungod kay tibuok adlaw kining nagsige og tawag sa biktima niadtong higayona apan walay motubag sa balay hinungdan nga nanawag kini sa ilang paryente didto sa barangay Taytayan nga nanugo pagsusi sa ilang panimalay.

Nakit-an nga ngitngit ang panimalay hinungdan nga gi-report nila sa kapolisan ug sa pagresponde nadiskubrehan nga gipang-lock ang pultahan ug sa dihang gipugos og abli natimahuan nila ang baho sa patay ug didto nagbuy-od na nga walay kinabuhi sa kama ang pensiyonada samtang nagkulob usab sa daplin sa pultahan ang katabang.

Subay sa gihimong pakisusi sa kapolisan nahanaw na ang alahas ug kwarta sa biktima nga gituohang gidala sa mga suspek sa pagsibat niini.

Ang kapolisan padayon pa sa ilang pag-ila ug paggukod sa mga tulisan.

Si Cebu Provincial Police Office director Jesus Gaquing mimando sa hepe sa Bogo Police Station sa pagresolbar sa kaso sa daling panahon.

Nagtuo si Gaquing nga sama sa nahitabo sa Barili, local boys ang mitira sa pensiyonada ug katabang niini. – BANAT NEWS