Kapitolyo ikiha sa City Hall - Tomas

CEBU, Philippines - Ikiha sa kagamhanan sa dakbayan sa Sugbo ang kagamhanan sa lalawigan tungod sa napirmahan niining kasabutan pag-uli sa luna sa Central Command ngadto sa Kapitolyo.

Kini tungod sa wala pagtuman sa Presidential Proclamation nga nagdeklarar sa tipik sa nahisgutang luna isip socialized housing site.

Lakip na usab sa ipasakang kiha sa siyudad mao ang kapakyas sa provincial government paghatag og deed of sale ingon man sa titulo sa tanang 93-1 occupants.

Partikular na niini ngadto sa tanang benepisyaryo nga nakahuman na pagbayad sa ilang obligasyon sa kagamhanan sa lalawigan.

Nangayo na si Mayor Tomas Osmeña og pagtugot sa konseho sa siyudad alang sa pagpasaka og kaso batok sa Kapitolyo.

Ang resolusyon nga maghatag og pagtugot sa mayor pagkiha sa probinsya gitakdang iduso ug tukion atol sa sesyon sa City Council sa sunod semana.

“Kay dili ko ganahan nga akong ibilin ang urban poor nga way klaro ang ilang kaugmaon ba, kinahanglang mo-backfire gyud na sa probinsya,” sumala ni Osmeña. Gibutyag hinuon ni City Administrator Francisco Fernandez nga ubay-ubay nga kiha ang isang-at sa siyudad batok sa Kapitolyo.

Ang mga sakop sa Alliance of Barangay Apas Community Association (ABACA) nga mibisita ni Fernandez kagahapong adlawa nagpasalamat sa lakang sa siyudad.

Matud sa presidente sa ABACA nga si Marlene Paracuelles nga dako ang ilang kalipay sa himuong lakang sa kagamhanan sa dakbayan.

Nasayran gikan sa presidente sa ABACA nga gawas sa pagpasaka og kaso sa siyudad, ang ilang grupo moduso usab og kaso batok sa Kapitolyo. – BANAT NEWS