Tungod sa Fluvial Procession, Mactan channel sirad-an

CEBU, Philippines - Andam na ang tanan alang sa ipahigayong fluvial procession sa imahen sa Birhen sa Regla nunot sa kapistahan sa dakbayan sa Lapulapu sa sunod semana.

 Ang kalihukan gisangon sa mga komitiba kagahapon sa buntag nga pangulohan ni Rudy Villanobos ang administrative officer sa Lapulapu City Tourism Commission ug mga sakop sa Philippine Coast Guard, Philippine Air Force, NAVFORCEN, kapulisan, Philippine National Red Cross, ERUF ug uban pang ahensiya nga naglangkob sa maong kalihukan.

 Nahukman nga ang Mactan channel sirad-an sa mga barkong modunggo ug mobiya dinhi sa Sugbo alas 7:00 sa buntag ug ibalik alas-10 na sa buntag sa maong adlaw tungod sa maong fluvial procession.

 Ang PCG maoy manguna sa mga marshall sa maong kalihukan atol na unya sa paglawig sa M/B Magdaragat nga himuong galleon ug sakyan sa imahen sa Birhen sa Regla gikan sa Pacific Cebu Resort sa barangay Subabasbas ngadto na sa Muelle Osmeña Warf sa barangay Poblacion dakbayan sa Lapulapu.

 Gawas sa mga assets sa militar dunay 15 ka Jetski ug lima ka speedboat sa usa ka pribadong dive shop ang moabag aron gamiton sa seguridad ug komunikasyon.

 Matud pa ni Villanobos nga bisan pa sa gamay nilang budget sa maong kalihukan ila gihapon himuon ang naandang tradisyon sa mga deboto matag tuig.

 Ang mga sakop sa Tourism Commission midonar sa maong kalihukan sa ilang usa ka bulang honorarium aron madugangan ang ilang gahin alang sa maong kalihukan.

 Ang fluvial procession himuon karong Nobiyembre 12, 2009 sugdan kini pinaagi sa usa ka Santos nga Misa sa Marigondon Parish Church sa alas 6:00 sa buntag ug dad-on kini ngadto sa Muelle Osmeña wharf ug sugaton nila ni Lapulapu City Mayor Arturo Radaza, mga konsehales ug ABC Pres. Hon. Leo Mercado ug mga debotos.  -  BANAT NEWS