Kuryente, telepono gibalik ni Gungob

CEBU, Philippines - Gibalik na sa mayor sa lungsod sa Consolacion ang linya sa telepono ug kuryente sa Consolacion Police Station niadtong Miyerkules human giputlan ang maong buhatan sa maong serbisyo agi og ‘pagpahinumdom’ kanila kun si kinsa ang mayor sa maong dapit.

Mapasalamaton hinuon si Sr. Supt. Jesus Gaquing, director sa kapulisan sa lalawigan sa Sugbu ngadto kang Consolacion Mayor Avelino Gungob nga gibalik na niini ang linya sa kuryente ug telepono.

Unang gipabalik og taod ang linya sa telepono niadtong Miyerkules samtang gibalik usab niini kagahapon sa buntag ang pag-connect sa linya sa kuryente human gipaputlan sa mayor niadtong Martes.

Ang mayor mipadayag nga ang iyang gihimo pagpahimangno kini ngadto sa kapulisan gumikan sa kahiubos sa mayor nga gi-recall ang iyang duha ka mga police escorts nga dunay mga kaso sa Ombudsman.

Si Gaquing nagkanayon nga mga alas-10 sa buntag kagahapong adlawa gipahibalo siya sa hepe sa Consolacion nga si Sr. Insp. Bonifacio Tecson nga gipabalik na sa mayor ang linya sa kuryente.

Apan usa unya sa iyang lakang nga iduso sa ilang mga kadagkuan sa PNP nga makapataod sila’g kaugalingong supply sa kuryente ug telepono ingon man makabaton og kaugalingong police station.

Iyang gi-angkon nga ang matag police station sa probinsya sa Sugbu nagdawatan og hinabang sa mga local government units.  - Guam Logroño (BANAT NEWS)