Tomas di motuo Atan mag-mayor sa siyudad

CEBU, Philippines - Dili kumbinsido si Mayor Tomas Osmeña nga magpapili og laing posisyon ang duha ka lider sa oposisyon sa siyudad nga sila si sportsman Jonathan Guardo ug Kapitan Mary Ann delos Santos sa Lahug.

Sila si Guardo ug delos Santos mipadayag nga pulos abli sa posibilidad nga magpapili pagka-mayor ug bise mayor sa dakbayan sa umaabot nga eleksyon.

Kini kun sila makumbinser nga dunay igong pag-awhag sa mga Sugbuanon nga padaganon sa nahisgutang mga posisyon sa 2010.

Apan nagtuo si Osmeña nga paukyab lang nilang Guardo ug delos Santos ang gipadayag niini ug nangita lang og publisidad.

“Because they’re so desperate to get into the newspapers, I think, eventually they will, the two of them, will run for congressman because it does not make sense,” matud ni Osmeña.

Gitataw sa mayor nga napildi na si delos Santos sa tanang barangay sa south district atol sa pagpakig-atbang niini kaniya pagka-mayor sa miaging eleksyon.

Midugang si Osmeña nga duha lang usab ka barangay ang gidag-an ni delos Santos diha sa north district atol sa nahisgutang piniliay.

Sa susamang kalambuan, miingon ang mayor nga tulo lang usab ka barangay ang gidag-an ni Guardo sa south district sa pagpapili niini pagka-kongresista.

Sama kang Mayor Osmeña, kulang usab sa pagtuo si kanhi Senador John Henry ‘Sonny’ Osmeña nga mag-mayor ug magbise-mayor sila si Guardo ug delos Santos.

Ang igsuon sa mayor nga si Georgia Osmeña miingon nga iyang hangpon kun makahukom si Guardo o delos Santos pagpapili sa nahisgutang posisyon. – BANAT NEWS