Good vs. Evil Brigade ilusad

CEBU, Philippines - Usa ka non-government organization (NGO) dinhi sa Sugbo milusad sa “Good vs.Evil Brigade” nga kampanya alang sa umaabot nga election karong Mayo 2010. Ang Good vs. Evil Brigade usa ka kalihukan ug krusada batok sa mga dautan nga mga binuhatan sa ubang grupo nga namunoan sa gobiyerno ug sa mga politico.

Si Francisco Fernandez, presidente sa Pagtambayayong Foundation nagkanayon nga ang mga tawo nga naggikan sa nagkalain-laing sektor ilabi na sa urban poor, simbahan ug akademya gipul-an na sa mga dautang binuhatan sa ubang mga opisyal sa gobiyerno ug sa ubang mga politiko.

Gipasabot ni Fernandez nga ang ilang grupo usa ka non partisan, kansang tumong   mao ang pagduso sa matarong nga mga buhat.

Matud pa ni Fernandez nga sa sitwasyon karon sa demokrasya ang usa nga mabasol niini mao ang katawhan tungod sa pagpili og mga dili maayong lider.

Matud niya nga panahon na nga ang mga Cebuano angay nga mopili sa sunod nga eleksiyon og mga maayong lider nga maoy modala sa renda sa gobiyerno.

Ang Good vs.Evil kansang buhatan anaa mahimutang sa 102 P. Del Rosario Extension, dakbayan sa Sugbo molusad pormal ning maong kampanya sa Nobyembre 8, 2009 sa alas 3:00 sa hapon.

Gibutyag usab ni Fernandez nga adunay ipahigayong Voters Education Program ang mga NGO sa tibuok lalawigan ug adunay gikatakdang ilusad nga programa sa radyo niining semanaha nga magsuporta sa krusada.

Ang Good vs. Evil naglangkob sa tibuok probinsiya sa Sugbo ug gikatakdang mopalapad pa sa ilang kalihukan sa tibuok nasud.  - Brenda D. Batuto (BANAT NEWS)