Giluba buko-buko tuhab

CEBU, Philippines - Natuhab ang bukobuko sa usa ka bana kinsa gidunggab pag-unay sa iyang asawa didto sa sitio Cagudoy, barangay Basak, dakbayan sa Lapulapu sa miaging kaadlawon.

Ang biktima mao si Mark Mercado, 27, nga taga Cagudoy, samtang ang suspetsado mao ra ang kaugalingon niyang asawa nga si   Lorena, 36.

Si SPO3 Rex Ybañez sa Lapulapu City Police Station mibutyag sa Banat News nga sa sayo pa gikulata nga walay kukaluoy sa biktima ang iyang asawa.

Dihang naupos na ang pailob sa asawa kinsa giingon sa mga silingan nga gihimong punching bag sa iyang bana, midagan kini ngadto sa ilang kusina.

Pagsil-ing niya nga nagsinawsinaw sa kahait ang ilang kutsilyo gilanit kini ug gihansak sa bukobuko sa iyang bana.

Pagtaop sa maong kutsilyo natuhab ang bukobuko sa biktima ug didto pa kini moundang   sa pagkulata sa iyang asawa.

Matud pa ni SPO3 Ybanez nga dihang misidlit na ang dugo sa likod sa biktima, puwerting sirita og dagan sa suspek ug wala na nila kini igkita hangtod sa pagsuwat ning maong balita.

Samtang ang biktima nagpaalim sa samad niya sa bukobuko nga matud pa sa mga silingan walay peligro kay layo ra sa tinae. - Romeo T. Limpangog ug Bong Soriano (BANAT NEWS)