Kalag-kalag sa Talisay malinawon

CEBU, Philippines - Ang pagsaulog sa kalag-kalag sa dakbayan sa Talisay malinawon ug ang kapolisan walay nasakmit bisan usa ka armas gawas sa ilimnong makahubog nga gisulod og botilya sa mineral water ug soft drink.

Hinuon ang ilimnon ray gisakmit apan wala dakpa ang mga tawo nga buot untang mopayuhot niini ngadto sa menteryo.

Si Superintendent Henry Binas, hepe sa Talisay City Police Station mibutyag sa Banat News kagahapon nga gikan niadtong Nobiyembre 1-2, 2009, 24 oras silang nagbantay sa mga menteryohan sa siyudad ug walay nadawat bisan usa ka reklamo gikan sa katawhan.

Matud ni Binas nga walay nabiktima sa panguot o kaha pagpanglabni ug bisan ang bahin sa sound system wala sila’y namatikdan nga nagpatukar niini sulod sa mga menteryohan sa dakbayan.

Walay bisan usa nga naninda og ilimnong makahubog sa duol sa menteryohan nga maoy usa sa hinungdan sa kamalinawon sa tanang lubnganan sa Talisay.

Niadtong Nobiyembre 2, 2009 ang mga pribadong menteryo dali kaayong namingaw matud pa ni Binas apan ang mga menteryohan sa gobyerno didto magdasok ang katawhan nga miduaw sa lubong sa ilang minahal sa kinabuhi.

Si Binas mapasalamaton sa publiko sa ilang pagtamod sa mga pahimangno sa kapolisan una moabot ang kalag-kalag.  - Brenda D. Batuto (BANAT NEWS)