Way extension sa voters registration

CEBU, Philippines - Giklaro ni Provincial Comelec supervisor Lionel Marco Castillano nga wala nay extension sa registration alang sa mga bag-ong botante sa umaabot 2010 eleksyon human kini napupos niadtong Oktobre 31 sa tungang gabii. Matud pa niini dunay kapin sa 2 mil ka mga tawong nagparehistro niadtong Oktobre 31 nga nasirad-an sa mga buhatan sa Comelec sa tibuok probinsya sa Sugbu.

Gipasanginlan sa maong mga tawo ang Comelec sa kakuwang sa kahimanan maong wala na sila matagad aron marehistro.

Ang registration gisugdan sa milabay pang tuig hangtud niadtong Oktubre 31 ning tuiga, apan nianang adlawa pa(deadline) sa bisan asang dapit sa lalawigan ug Metro Cebu namatikdang nagpunsisok ang mga interesadong magparehistro aron makabotar sa 2010 elections. Apan mipasabot si Castillano segun sa iyang nahibaw-an didto ra sa Manila ang dunay extension sa pagpangrehistro sa mga bag-ong botante tungod kay nadelatar kini pag-igo sa kalamidad sa maong lugar sa milabay’ng buwan.

Tungod niini, si Castillano nangayo og despensa sa kapin 2 mil ka mga tawong nasirad-an niadtong Oktobre 31 gumikan kay taas kaayo ang gihatag nga tagal alang sa rehistrasyon apan duna gihapoy mga tawong nagdugay-dugay sa ilang pagparehistro maong naabtan sila sa gihatag nga deadline.

Matud niini nga bugtong paglaom nalang niadtong wala makaparehistro ilabina kadtong nagplano nga modagan sa piniliay nga mosang-at nalang og petisyon ngadto sa korte aron mao nay modesisyon kun paboran ba niini ang petisyon depende kun unsa ka balido ang rason sa petitioner. - Rey Pasaporte (BANAT NEWS)