60 anyos gipatay

CEBU, Philippines - Nalungag ang ulo sa 60-anyos nga tigulang human kini gisaka sa iyang balay ug gipusil samtang nahinanok sa pagkatulog sa sitio Kapayas barangay Sac-on lungsod sa Carmen niadtong Domingo sa alas 11:30 sa udto.

Ang biktima mao si Jovencio Fajardo, 60, molupyo sa nahisgutang lugar samtang ang suspek wala pa mailhi sa kapulisan sa paghimo ning balita.

Matud pa ni SPO1 Danilo Laurente sa Carmen Police dihang nahinabi sa Banat News ang biktima nahinanok sa pagkatulog daplin sa pultahan nga kawayan sa iyang balay nga wala i-lock dihang sekretong gisaka sa suspek ug gipusil.

Ang manghud nga babaye sa biktima nga nagpuyo sa pikas balay maoy nakadungog sa lanog nga buto sa armas hinungdan nga dali niyang gisusi ang iyang igsuon ug mao nalay iyang nakit-ang nagbuy-od na kini daplin sa pultahan nga nagkadugo ang ulo.

Ang kapulisan padayon pa sa imbestigasyon pagtumbok sa suspek ug sa motibo sa maong pagpamusil sanglit wala pay namatikdan ang mga silingan sa biktima nga duna kini kontra sa ilang lugar. - Darrel Carumba (BANAT NEWS)