CEBU, Philippines - Si Governor Gwendolyn Garcia kinsa mao ang presidente sa Once Cebu Party andam nga modawat sa pag-resign ni Vice Gov. Gregorio Sanchez sa partido.
Kini ang reaksyon ni Garcia sa migawas nga report nga mobiya na sa partido ang bise gobernador tungod sa kapakyas sa gobernadora sa pagpaminaw sa iyang mga baruganan.
Matud pa sa gobernador nga ang gipangayo ni Sanchez wala mahasubay sa polisiya sa One Cebu Party nga mao ang paghiusa sa lalawigan sa Sugbu.
Si Sanchez sa nahaunang report nagkanayon nga wala nay pulos ang iyang pagpabilin sa maong partido tungod kay wala na usab siya kahimut-i sa mga political leaders niini.
Nasayran nga nagkasumpakiay na ug giingong naapektahan na ang relasyon sa bise gobernador ug ni Garcia tungod sa wala mahinayong Transaxial Highway project, pagpa- rescend ni Sanchez sa kontrata sa Kapitolyo sa pagpalit sa kontrobersyal nga Balili lot sa lungsod sa Naga ug ang labing uwahi mao ang pagdawat sa gobernador sa kontra ni Sanchez sa politika nga si Tuburan Mayor Constancio Suezo III.
Ang gobernadora hingpit nang midawat sa ilang partido si Suezo ug nangita na sila og laing political leader nga ihulip kang Sanchez atol sa General Assembly karong bulana.
Samtang si 3rd district congressman Pablo John Garcia ang Secretary General sa One Cebu Party nagkanayon nga sigon sa ilang nahibaw-an nga dugay nang may plano ang bise gobernador sa pagbiya sa partido.
Si Pablo John nagtuong may plano nang daan ang bise gobernador sa pagdagan sa pagkagobernador atbang sa gobernador ug gihimo na nila ang tanan aron masulbad ang kasungian apan kagahapon si Sanchez mipasabot nga non-negotiable na ang iyang demanda. - Chester Abadilla (BANAT NEWS)