'Flying voters' gipanghimakak

CEBU, Philippines - Giimbento lamang sa kampo ni Mayor Jonas Cortes ang alegasyon ni Atty. Francisco Amit nga mga flying voters nga giparehistro sa kampo ni 6th District Representative Nerissa Soon-Ruiz.

Si Amit mialegar nga ilang namatikdan ang daghang mga sakyanan nga giluwanan og mga batan-on gikan sa Consolacion, Cordova ug dakbayan sa Lapulapu nga giparehistro sa Comelec sa Mandaue.

Matud pa ni Amit nga gigamit sa last termer nga kongresista ang iyang mga scholars gikan sa maong mga lugar pinaagi sa pagparehistro kanila sa dakbayan sa Mandaue.

“We suspect that, these are flying voters. Some of them are ordinary fishermen from the islets of Lapulapu City judging from their blonde hair and rugged attires,” matud pang Amit.

Si Amit nagtuong ang gihimo sa kongresista maoy makaingon sa grabeng pagsulbong sa gidaghanon sa rehistradong botante sa Mandaue nga 180,000 gikan sa 140,000 nga gidaghanon sa miaging piniliay.

Apan kini gisalikway sa abogado sa kongresista nga si Atty. Gonzalo Malig-on ug miingon nga inimbento ra ang maong alegasyon sa kampo sa mayor.

“Nagsalimuang na siya (Cortes) kay nagpatuyang na lang og imbento og estorya,” nagkanayon si Atty. Gonzalo Malig-on, executive staff ni Kongresista Soon-Ruiz sa iyang pamahayag dihang nahinabi sa mga tigbalita isip reaksiyon sa pasangil ni Amit. – BANAT NEWS